مصر أون لاين جريدة اخبارية – ثقافية – فنية – اقتصادية – سياسية – شاملة
بقلم الدكتور / محمد عبد الفتاح
المرة دي معانا ” 4 ” حكاية في بعض وكلهم حصلوا في خلال أسبوع .
حكاية ١
طفل ٧ سنين جاي لي بيرجع بقاله يومين و الأم جاية تكشف علشان الواد بيجيب ترجيع بني غامق… كشفت عالواد لقيته مولع نار و حرارته ٣٩ و بالسماعة مفيش حاجة و زوره محتقن على خفيف (قلت اكيد من كتر الترجيع) الأم قالت ان الموضوع بدأ بعد ما أكل “بوزو” و هو بيحب ياكل و ايده مش نظيفة….. فحصت بطنه مفيهاش حاجة بس بتوجعه شوية من النصف ، سألت الأم الولد اصفر قالت لأ، طب لون البول اتغير قالت لا .
الصراحة مطمنتش… سحبتله معامل صورة دم وظايف كبد و معامل سيولة الدم و أثناء انتظاري النتيجة خليت الطفل ياخد حقنة زوفران توقف الترجيع و طلعت النتايج و لقينا صورة الدم توحي بالتهاب فيروسي و تحليل السيولة كان ملخبط شوية خفيفة بس لقينا وظايف الكبد طلعت عالية (فوق ال ٢٥٠) وعلى أساس الكلام ده طلبت تحليل الالتهاب الكبدي الوبائي A و طلع إيجابي ، وشخصت الحالة على انها التهاب كبدي وبائي A .
حكاية ٢
طفل ١٢ سنة جاي سخن مولع و بطنه واجعاه و عنده خمول واضح و ميل للقئ و الام بتقول انه مش بيصفر و لون البول مش متغير بس الولد مدمن أكل من الشارع .
بالكشف لقينا عنده شوية hepatomegaly (تضخم طفيف بالكبد) من غير صفرا و لا اي علامات مرضية تانية طلبنا نفس المعامل (من غير السيولة) و لقينا نفس النتايج و اتشخصت بردو التهاب كبدي وبائي A .
حكاية ٣
طفل ١٠ سنين سخونية خفيفة بس عينيه حارقاه و عنده ترجيع سألنا نفس الأسئلة طلعت ان الولد معندوش حاجة باستثناء انه أكل كبدة الصبح و تعب بالليل حللنا نفس التحاليل بتاع حكاية ٢ طلعت نفس النتايج و اتشخص بردو التهاب كبدي وبائي A .
حكاية ٤
بنت أمورة ٨ سنين جاية بترجيع مستمر من غير ترجيع و لا حرارة و الأم بتقول انها مشافتش البول و لا في صفرا و لا البنت أكلت من برا و لا حاجة بس قلبي ما طاوعنيش و قررت اعمل نفس التحاليل لقيت وظايف الكبد بالآلاف و الفيروس إيجابي ، و اتشخصت انها التهاب كبدي وبائي A .
من هنا بنبه ان ال HAV مش شرط صفرا و لون بول غامق، لازم نفكر فيه لما تلاقي حرارة مستمرة او قئ مستمر و خصوصا مع الأطفال الكبيرة شوية .
حبينا ننوّه عن الجزء ده خصوصا ان في احتفالات و مهرجانات فالأكل برا البيت بيبقى على أشده الأيام .
تابعونا مع حكاية تانية من حكايات في العيادات
