بقينا محتاجين دار جوه كل دار والله

Spread the love

كتبت /  منت الله عبد الوهاب . 

 

للأسف مش كل شئ حرام الناس بعدت عنه .! والسبب بعدنا عن ربنا وعدم الإخلاص في العبادات والتفكك الاسري واللامبالاة اللي موجوده فى معظم البيوت، وانشغال الاب والام بجمع المال لتأمين مستقبل اولادهم ، و من غير اصلاً ما يركزوا معاهم في تفاصيل حياتهم..؟
بجد الله يرحم اهالينا اللي تعبوا في تربيتنا وامهاتنا اللي ياما ضحوا بمستقبلهم لانهم شافوا ان احنا مستقبلهم ورسالتهم.. لكن النهارده أمهات كتير بتصارع في علشان تحقق ذاتها وبس، مش مهم مين الضحيه لأنها شايفه انها كده بتعمل اللي عليها وبتساعد في تحسين مستوي المعيشه وما يترتب عليه من اهوااال…

طبعاً البيت الصغير -اللي كان زحمه- كان مليان حب وحنان اتحول لفيلا مثلاً او بيت كبير بس بارد مافيهوش دفا..
محدش حاسس بالتاني ولايعرف عنه حاجه، بيكلموا بعض ع النت وهما في بيت واحد عباره عن مجموعة غرف مقفوله كل واحد لوحده..! والله اعلم بالمصائب اللي بتحصل فيها..

إذا كانت الام اتفرغت زمان لتربية ولادها واستقرت في بيتها ف النهارده هي محتاجه تتفرغ اكتر واكتر لان الحياه أصبحت أصعب. .وأعمق .. دلوقتي فيه امهات متعرفش بنتها لبست ايه وهي نازله الصبح مثلاً لانها نزلت قبلها او كانت نايمه لسه مجاش ميعاد نزولها .. مع انها لازم تشوف وتقيم وتراقب من بعيد وتبطل كلمة “حريه شخصيه وانا واثقه فيها ” علشان نتجنب المفاجآت.. امهاتنا اما كانوا بيصحوا معانا ويفطرونا ويودعونا ع الباب ويتمموا علي كل حاجه فينا مكانش عدم ثقه✋🏻..والله ده كان حب واهتمام💝..
سفرة الفطار وكلمة “غير ريقك قبل ما تنزل” خلاص انتهت ولمة الغدا والعشاء وكلمة استني بابا واخواتك ملهاش وجود مع “الديليفري ” بس الديليفري محدش عمله بحب ولا لمنا مع بعض وفضلنا نتكلم ونضحك واحنا بناكل وكل واحد يحكي اللي عنده..

لو انتوا شايفين ان الحاجات دي تافهه او بسيطه فأنا شايفاها جذور واساس اتبني عليه اجيال مازالوا صامدين لتيارات الرياح الشديده ويدوب تهزهم لكن مبتوقعهمش وسط تطورات الحياه المخيفه ف التفاصيل دي هي سبب الترابط الأسري اللي موجود بين معظمنا لحد النهارده وبنحاول نزرعه في اولادنا..

أرجوكم انتبهوا لاولادكم..ابنوهم قبل ما تبنوا لهم علشان ميجيش اليوم كل اللي بنيتوه يتهد في اوضه مقفوله في بيتكوا وانتوا موجودين ومش جاي علي بالكوا تفتحوها مره وتدخلوا تزوروا سكانها او تفتحوا معاهم حوار او تصلوا بيهم جماعه وقت الصلاه..
عزيزي الأب..مع الأسف الشيطان دخلها بالرغم من باب بيتك المقفول اللي عليه كاميرات اقتحم بيتك وحياتك ووصل لعقل ولادك

ومن غير ما تاخد بالك انك انت السبب الاول في دخوله وانت بتحارب علشان ترفع مستوي المعيشه
انا متاكده ان كلنا عارفين الكلام ده كويس بس معظمنا مغمض عينه..
تحياتي لكل ام ادركت يعني ايه اولادي حياتي.. قرة عيني.. رسالتي..وبيتي هو مملكتي

شاهد أيضاً

محافظ الغربية قريباً رصف طرق بمراكز المحلة الكبرى و بسيون و قطور و زفتى و السنطة

Spread the loveكتبت شيماء نعمان      حرصا من اللواء أحمد ضيف صقر محافظ الغربية …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *